Лоас-ӧ водзӧсыс бӧрйысьысьяслӧн забастовкаысь?

Кыдз тӧдса, ЦИК эз лэдз президентӧ кандидат лыдӧ Алексей Навальныйӧс. Политик водзӧс пыдди йӧзӧдіс сідз шусяна «бӧрйысьысьяслысь забастовка».

Веськыда кӧ шуны, тані абу ставыс ясыд. Гӧрвоана, босьтчисны кӧ бастуйтны шахтерхяс, нефтяникъяс, то тӧдан, мый тайӧ татшӧмыс. Забастока – тайӧ кор йӧзыс ӧткажитчисны уджавны да тайӧ акцияыс мунӧ властьлы паныд. Дугдасны кӧ нефтяникъяс перйыны му пытшкысь «сьӧд зарнисӧ», то Путинлы да сылӧн кытшсалы зептас воас этшаджык нефтедоллар, – тайӧ зэв мӧрччанатор. Забастока чорыда кучкӧ экономика кузя.

А мый сетас Бӧрйысьысьяслӧн забастовка. Повзьӧдлыны властьсӧ сійӧн, мый огӧ мунӧй гӧлӧсуйтны?! Повзяс-ӧ власть? Экономическӧй уӧ, повзяс, а тані ӧдвакӧ. Мӧдарӧ на, нымын этшаджык бӧрйысьысь волас участокъяс вылӧ, сымын унджык позянлун властьлы фальсифицируйтны помшуӧмсӧ. Бюллетеньсӧ сылысь, коді эз волы, избиркомса шыбитасны урнаас.

Сідзкӧ, бӧрйысьысьяслӧн забастовкаысь водзӧсыс вермас лоны сӧмын сэк, кор тайӧ лоас ыджыд, уна лыда, массӧвӧй акцияӧн, кор тайӧ водзмӧстчӧмас сюртчасны миллионъяс, кор тайӧ лоӧ режимлы паныд ыджыд вынӧн. Кор лоӧ нуӧдӧма быд участок бӧрся тырвыйӧ контроль. Медым позис артавны, кымын морт воліс гӧлӧсуйтны. Дерт, властьыс фальсифицируйтас лыдпассъяссӧ, но мед тайӧ лои помкаӧн массӧвӧй протестъяс вылӧ.

Политическӧй тышын вермас оз сійӧ, кодлӧн бурджык программа, а сійӧ, кодлӧн унджык мобилизационнӧй ресурс-вынйӧр. Талун кежлӧ оппозиционеръяс пиысь сӧмын ӧтнас Навальныйлӧн эм сійӧ. Кольӧ куш кужӧмӧн вӧдитчыны воссьӧм позянлунъясӧн.

Бойкотыс ӧдвакӧ сетас водзӧс. Артавны кӧ лыдпасъясӧн. Социологъяс арталӧм серти, бӧрйысьӧм вылас дасьӧсь локны 60 процент йӧз. Но власть лэдзис установка вӧчны этша вылӧ 70 процент. Сідзкӧ дассӧ содтасны закон торкалӧмӧн. Ясыд, кодлы гижасны «содтӧд" бюллетеньяссӧ, медглавнӧй кандидатлы. Тайӧ сэк, оз кӧ ло бойкотыс. Бойкот чинтас волысь лыдсӧ, явкасӧ ылӧсас 1-2, уна вылӧ 3-4 процент вылӧ. Сідзкӧ збыль вылас волас шуам 56 процент. Но власть сё равно вайӧдас явкасӧ 70 процентӧдз, а та понда содтас нин оз 10, а 14 процент. Тайӧ 14 процентыс сідзжӧ вичмас ставыс тӧдӧ кодлы.

Татшӧм сикас юалӧмъясас Ленин в кутіс асьсӧ сюсьджыка да мудерджыка. Сійӧ гижліс ликвидаторъяс до отзовистъяс йылысь гижӧдъяссӧ. Сійӧ эз лыддьы мый колӧ шыбӧлитчыны пельӧсас, ӧтиладорас. Ни бойкот, ни антибойкот оз сет став гӧрӧдсӧ разян помшуӧм. и ӧти воськолыслӧн, и мӧдыслӧн эмӧсь и вынатор, и тырмытӧмтор, и плюс, и минус. Бойкотистъяслӧн медбур аргументыс зэв эскана: власть оз кут артавны гӧлӧсъыссӧ, а сӧмын гижас кандидатъяслы лыдпасъяссӧ сымда, мыйта кодлы кӧсъяс. Коркӧ Сталин шуліс, помкаыс абу сыын, кыдзи коді гӧлӧсуйтіс, а сыын, коді кыдзи арталӧ гӧлӧсъяссӧ. Путинскӧй Россиын тадзи жӧ кымын и вӧчсьӧ.

ВЦИОМ серти, Путин вӧсна дасьӧсь гӧлӧсуйтны 81 процент. Тайӧ висьталӧ, мый Россия вочасӧн синӧ Шӧр Азияса режимъяслань. Но збыль вылас ВВП-лӧн некутшӧм рейтинг абу. Тайӧ став процентыс суйӧравтӧм властьлӧн ыджыдалӧмкӧд йитчӧма. Колӧ сӧмын ӧтчыдысь слаблун петкӧдлыны, кыдз став тайӧ процентыс здукӧн киссяс, воас нульӧдз.

Сьӧкыд аддзыны петан туй, коді эськӧ разис став гӧрӧдсӧ став ситуация дырйиыс. Медвойдӧр колӧ пуктыны юалӧм: мый ми кӧсъям тайӧ бӧрйысьӧмсьыс? ӧткымын кандидат ас водзас пуктіс мог шедӧдны гоз-мӧд процент и рад талы. Но тайӧ шогмытӧм мог. Медглавнӧй могыс – бырӧдны Россияын авторитарнӧй режим. А тайӧс пӧртны олӧмӧ уна йӧза протестъястӧг оз артмы. Сідзкӧ колӧ сэтшӧм воськов, коді петкӧдас уличаяс вылӧ кыдз позьӧ унджык йӧзӧс.