Бӧръя кадӧ ёна вензьӧны «Смерть Сталина» фильм кузя. Минкульт бердса экспертъяслӧн сӧвет шуис сійӧс ӧтдортны кинотеатръясын петкӧдлӧмысь. Подулаліс тадзи: фильмас омӧльтӧны пӧ миянлысь история, пестӧны лӧглун национальнӧй да религиознӧй подув серти, дойдӧны йӧзсӧ, торйӧн кӧ, ветеранъясӧс да сідз водзӧ. Ӧткымын «ырӧша патриот» горзӧ информационӧй войнаын дзонь диверсия йылысь.
Кӧсъя вензьыны татшӧм туйвизьыскӧд. Ме фильмсӧ эг видзӧдлы, кӧть эськӧ кӧсъя. Ветлі «Рубликӧ». кӧні шуисны, миян начальство ӧткажитчис пӧ петкӧдлӧмсьыс. Кӧть эськӧ сетліс позянлун «Матильда» вылӧ.
Та вӧсна видла донъявны сійӧ юӧр вылӧ мыджсьӧмӧн, коді воис информационнӧй каналъяс пыр. Кыдзи казалі, фильмас абу некутшӧм лӧглун национальнӧй, религиознӧй да мукӧд подув вылӧ кутчысьӧмӧн пестӧм. Ни ветеранъясӧс, ни сӧветскӧй войтырӧс оз омӧльт. Ыстысьӧны вежатор вылас найӧ, кодъяс зільӧны пыкны туй кинакартинаыслы миян экран вылӧ. Кыдз тӧдмӧдісны, эмӧсь и тырмытӧмторъяс, но тайӧ абу помка мырддьыны миянлысь право видзӧдны либӧ абу видзӧдны фильмсӧ. Пестыссьӧ кӧ лӧглун, то сӧмын ӧти социальнӧй котырлы паныд, и тайӧ котырыс шусьӧ: вождьяс.
Вождьяс – тайӧ медся страшнӧй социальнӧй котыр. И сійӧс нинӧмла дорйыны. Кыдзи тайӧс вӧчӧны быдсяма ток-шоуяс вылын миян телеканалъясын. Мораль торкӧм – тешитчыны кӧ шуам национальностьяс, религияяс либӧ вермытӧм-инвалидъяс вылын, а ыджыд чинаяс вылын сералӧм – абу лёктор. Вождьяс вылын, кодъяс нем думайттӧг, яндысьтӧг кыдз кӧсйӧны пӧгибӧ вайӧдӧны уна миллионо мортӧс, жуглӧны налысь судьбаяссӧ.
Фильм лэдзӧмыс – абу диверсия. Диверсияыс – властьлӧн фильм петкӧдлӧм вылӧ реакция, вочавоськов.
Мыйла власть, Кремль паныд «Смерть Сталиналы»? Мыйын медглавнӧй помкаыс? Мыйла «Матильдаӧс» кӧть и пинялісны жӧ, весиг ультраправославнӧйяс пикет сувтӧдісны, но фильмсӧ лэдзисны экран вылӧ, а Сталин кулӧм йывсьыс оз лэдзны? Сы вылӧ видзӧдтӧг, мый коммунистъяс непоштӧ пикет, но и гӧлӧссӧ эз сетлыны водзсасьӧм могысь.
Главнӧй покаыс сыын, мый «Смерть Сталинаын» сералӧны вождьяс вылын. Оз-ӧ Путин тайӧ серамсӧ ас вылас ӧткодяв? Сійӧ чайтӧ, сералӧны кӧ Сталин вылын, то и сы вылын, Путин вылас, кутасны серавны. А власть вылын кӧ сералӧны, то и повны дугдасны. А дугдасны кӧ повны, то вермасны чӧвтны.
«Смерть Сталина» фильм десакрализуйтӧ Россияын ыджыдалысь да веськӧдлысь режимсӧ. Та вӧсна и чинаяс сувтісны сійӧс петкӧдлӧмлы паныд.
Сідзжӧ лыддя, мый конотеатръяс долженӧсь лоны ыджыдджык асшӧрлуна да не кывзысьны властьлысь, не видзӧдны налы вомас. Кино петкӧдлысьяслӧн да видзӧдысьяслӧн долженӧсь лоны асланыс правояс. да интересъяс, кодъясӧс колӧ быть пыдди пуктыны.
Менӧ шензьӧдіс НТВ телеканал вылын «Место встречи» программаын либералӧн асьсӧ шуысь Б. Надеждинлӧн шуасьӧм, оз пӧ позь лэдзны йӧзыслы видзӧдны тайӧ фильмсӧ. Мыйла сідзкӧ шусян либералӧн? Шусин кӧ реакционерӧн, дзескӧдысьӧн, асмезд пӧдтысьӧн, тайӧ эськӧ лӧсяліс збыльыслы.
СССР киссис буретш сы вӧсна, мый туйтӧм вӧлі политическӧй системаыс, кӧні идеологическӧй юкӧнын ыджыдаліс цензура. Ӧні бара ӧти и сійӧ жӧ куран вылас тувтчам.
